Xeral
O naval vigués retoma as mobilizacións e inicia unha campaña de sensibilización en defensa do sector
O sector naval da Ría de Vigo volveu a saír hoxe á rúa para denunciar a parálise do sector e a perda de case 11.000 postos de traballo directos dende 2008, o que representa o 80% do emprego dunha industria que chegou a ocupar a unhas 14.000 persoas. Dende as centrais CIG, CCOO e UGT anunciaron a posta en marcha dunha campaña de sensibilización social que incluirá distintas mobilizacións.
Máis dun cento de delegados/as do sector participaron na asemblea convocada polos tres sindicatos maioritarios para analizar a problemática que atravesa unha industria que arrastra “dous anos de parálise total”.
Na xuntanza decidiuse a posta en marcha dunha campaña de sensibilización social que incluirá reparto de folletos informativos entre a veciñanza e mobilizacións.
Ao mesmo tempo, os representantes sindicais expuxeron os datos que amosan o progresivo desmantelamento do sector, até tal punto que este proceso foi cualificado como “unha nova reconversión sen ruído na rúa”.
Eymosa pretende despedir a 34 traballadores/as e aplicar un ERE de suspensión para outros 15 operarios
A CIG-Metal de Ferrol alerta que con este elevado número de despedimentos a empresa non poderá afrontar ningún tipo de carga de traballo.
A empresa Elaborados y Montajes, S.A., (Eymosa) situada no Polígono de Río do Pozo en Narón, vén de presentar un novo Expediente de Regulación de Emprego para despedir a 34 traballadores/as, reducir ao 50% a xornada a outros/as 4 operarios e un ERE temporal para 15 traballadores/as durante un ano.
A empresa, que conta na actualidade con 56 traballadores/as, xa aplicou outros expedientes de regulación e despedimentos nos últimos anos, a través dos que perderon o seu emprego máis de 200 operarios.
Dende a CIG-Metal, que conta con 6 dos 9 delegados do Comité (CCOO ten 2 e 1 é de UGT), denuncian que con esta cantidade de novos despedimentos “a empresa non vai poder afrontar ningún tipo de obra dende o momento en que se faga efectiva a saída destes traballadores/as”.
Ademais, Sergio Martínez, do Comité, acusa á empresa de aplicar os despedimentos “sen pensar o máis mínimo na futura viabilidade daempresa”.
Miles de traballadores/as do naval ferrolá volven ás rúas en demanda de carga de traballo e o dique flotante
Os traballadores/as de Navantia e as empresas auxiliares volveron saír ás rúas este xoves para reclamar carga de traballo e a construción urxente do dique flotante, como ferramenta de futuro e medio para paliar de xeito inmediato a falta de actividade que abafa aos estaleiros da ría de Ferrol. A mobilización realizouse coincidindo co paro de dúas horas convocado no estaleiro.
O persoal de Navantia-Ferrol, como vén sendo habitual, saía en manifestación dende as instalacións do Esteiro sobre as 10:30 horas. Dende alí marcharon até a AP-9, onde cortaron o tráfico a altura da glorieta de Basanta, mentres outro grupo de traballadores/as interrompía a circulación na rotonda de acceso á autoestrada pola estrada de Castela coa rúa Nicasio Pérez. Pola súa banda, o persoal do estaleiro de Fene permaneceu pechado no interior das instalacións, até ás 17:30 horas, momento no que saíron en manifestación até as portas do Concello.
Os traballadores/as da Fábrica de Armas inician un peche indefinido para esixir unha saída que permita á continuidade da planta
A Sección Sindical da CIG reitera que a fábrica é viábel e reclama a implicación real das administracións galegas na defensa do futuro industrial da comarca.
Os traballadores/as da Fábrica de Armas iniciaron un peche indefinido como medida de presión para que General Dinamics retire o expediente de extinción e abra unha negociación que permita unha saída viábel para á factoría da Coruña. Dende a Sección Sindical da CIG reiteran que as instalacións son viábeis e demandan a implicación real e contundente das administracións galegas para defender o futuro industrial da comarca. O encerro realízase de maneira conxunta nas distintas plantas que a multinacional ten no Estado español.
Na última oferta, a empresa propuxo adiar o peche da factoría (pois a pesar das demandas da parte social continúa na súa teima de rematar coa actividade da Coruña) até o próximo 1 de xuño, mudando o ERE de extinción por un temporal até esa data. Con tal obxectivo, no día de onte a parte social e a empresa remitiron un escrito á Dirección Xeral de Traballo para que permita ampliar o prazo para negociar unha saída. Hai que lembrar que o período de consultas do ERE remata este mesmo sábado.
Os traballadores/as de Alcoa Inespal continúan cos paros e mobilizacións en contra do descolgue do convenio
O persoal de Alcoa Inespal continuou este martes co calendario de paros e concentracións en rexeitamento ás pretensións da empresa de descolgarse do convenio e aplicar unha rebaixa salarial que suporía unha perda de ingresos de arredor de 4.000 euros anuais por traballador/a. Dende a Sección Sindical da CIG entenden que con esta medida a empresa só busca recortar máis as condicións laborais, xa que nin quere negociar fórmulas de retorno e nin sequera presentou un plan de viabilidade.
Na negociación realizada o luns, explica o responsábel da Sección Sindical da CIG, Julio Moskowich, non se produciu ningún avance, xa que a dirección da empresa mantén unha postura inmobilista, pretendendo impor a toda costa a rebaixa salarial sen ningunha contrapartida. Porén, a representación sindical presentou unha proposta alternativa para aceptar a formulación da multinacional, que pasa por incluír unha cláusula de garantía de devolución das cantidades subtraídas, no caso de que a empresa teña beneficios.
A CIG insiste na necesidade de agrupar forzas e reclamar solucións para o naval directamente no Ministerio de Facenda
Ante as informacións publicadas con motivo da reunión mantida o luns entre a SEPI, alcaldes da mancomunidade e representantes sindicais, na que non estivo presente a CIG, dende a Unión Comarcal reiterouse que a central nacionalista non está para facer de “palmera do PP”. “Non imos asistir a máis reunións das que se sae cunha nova suposta solución que non fai máis que dilatar a decisión sobre o dique e permite seguir botándolle a culpa aos demais”, sinalan.
Segundo o publicado na prensa hoxe, no encontro, a SEPI e Navantia informaron que iniciarán xestións para tentar renegociar o veto sobre Fene, mais confirmaron a súa oposición á levar adiante o dique flotante, escudándose unha vez máis nas presuntas trabas da Unión Europea ao financiamento público.
Concentración de traballadores e traballadoras de Lobelle coincidindo co comezo das tres xornadas de folga
As traballadoras e traballadores da empresa compostelá Lobelle concentráronse esta mañá entre as 10:00 e as 12:00 horas, diante da nave da empresa, no Cruceiro da Coruña (Santiago de Compostela), para reclamar as tres mensualidades que se lles adebedan. A mobilización coincide co comezo da folga convocada para os días 26, 27 e 28 de febreiro por mor dos continuos atrasos nos pagos, que se arrastran xa do ano 2012.
Lobelle solicitou un ERE de suspensión no mes de xuño de 2012, por un período de 5 meses. Durante ese tempo comprometíase a ter os salarios postos ao día antes de que rematara o ano. Porén durante todo ese período foi retrasando os pagos a todos os traballadores e traballadoras. No mes de outubro presentou un ERE extintivo para os traballadores/as de Lobelle Coruña, que foi aceptado e que afectou a 12 traballadores/as. A ese persoal pagáronselle os 20 días por ano traballado, salarios atrasados e todo o que se lle adebedebada.
Os traballadores/as da Fábrica de Armas inician un peche de 48 horas en contra do ERE
A Sección Sindical da CIG critica a nula vontade da empresa para buscar alternativas ao peche das instalacións da Coruña.
Os máis de 170 dos traballadores/as da Fábrica de Armas iniciaron na tarde deste martes un peche no interior das instalacións da Coruña, en rexeitamento ao ERE presentado por Santa Bárbara Systems (do Grupo General Dymanics) e as pretensións de rematar coa actividade da empresa. A medida de presión estenderase até a tarde do próximo xoves.
O calendario de mobilizacións continuará a próxima semana, coa convocatoria dunha folga de dous días. Aproveitando os paros, os traballadores/as trasladaranse na noite do martes até Madrid, para mobilizarse ao día seguinte diante da sede de General Dynamics, xa que alí terá lugar unha nova reunión do período de consultas do ERE.
Así mesmo, o xoves 7 de marzo, o persoal realizará unha marcha a pé dende a fábrica até a Delegación do Goberno, que sairá por volta das 10:30 horas.
Máis de 30.000 persoas maniféstanse en Ferrol en defensa do naval, polo emprego e o futuro da comarca
Máis de 30.000 persoas encheron as rúas de Ferrol na mañá do domingo 24 de febreiro en demanda de carga de traballo para o sector naval, a construción do dique flotante, o levantamento do veto, a defensa do emprego e o propio futuro das comarcas de Ferrol, Eume e Ortegal. Durante manifestación, convocada polos Comités de Navantia e os delegados/as da industria auxiliar, denunciáronse os reiterados incumprimentos dos gobernos co naval público galego, motor económico da comarca e un sector estratéxico para o conxunto de Galiza.
Ao remate da manifestación, nunha Praza de Armas que quedou pequena para acoller a todos/as os/as participantes, o responsábel da Sección Sindical da CIG en Navantia Ferrol, Marcelino Amado, valoraba moi positivamente a resposta dada pola cidadanía á esta nova mobilización en defensa do naval. Unha convocatoria coa que, matizou, se quere apuntar aos responsábeis políticos que arrastraron o sector a actuación situación de emerxencia.
A Sección Sindical da CIG rexeita o anuncio de peche da Fábrica de Santa Bárbara da Coruña
General Dynamics pechará a fábrica de armas e despedirá a 177 traballadores e traballadoras.
A Sección Sindical da CIG en Santa Bárbara vén de manifestar o seu máis enérxico rexeitamento ao anuncio da Dirección da Empresa de pechar a Fábrica de armas da Coruña. Dende a Sección Sindical critícase que o grupo General Dynamics non teña cumprido cos seus compromisos de inversións tecnolóxicas e achega de carga de traballo que adquiriu no momento da súa privatización, “como o demostran as Contas de Resultados Anuais, nas cales queda patente a dependencia case absoluta dos pedidos do Ministerio de Defensa”.
Neste sentido denuncian que dende a CIG sempre se defendeu que se lle dera autonomía ás fábricas para buscar alternativas de traballo no ámbito civil, que permitisen paliar as baixas nos pedidos de Defensa, “cousa que desde a Empresa nunca se apoiou”.
Fotografías
Vídeos